عفريت منحوس

قرر سائقو قطارات هيئة السكة الحديد الاعتصام ثم الإضراب عن العمل يوم الأحد المقبل الموافق  27/1/2008، بعد أن علقوا اعتصامهم الذي كان من المقرر بدؤه يوم الأحد الماضي بعد التوصل لاتفاق مبدئي مع أشرف سلامة رئيس الهيئة بصرف حافز الدرجة أسوة بما يتم صرفه لزملائهم في مترو الأنفاق، ودراسة صرف بدل الراحات علي الأجر الشامل في اجتماع مجلس الإدارة يوم السبت المقبل. أكد العاملون أنهم سيبدأون اعتصاما ثم إضرابا عن العمل في حالة عدم إقرار مجلس الإدارة لمطالبهم التي أقر وزير النقل محمد منصور بأحقيتهم في صرفها.. كان أكثر من 250 سائقا قد قاموا بوقفة احتجاجية ظهر يوم 20/1/2008، لمدة ساعة أمام مكتب رئيس الهيئة، ثم أنهي السائقين وقفتهم بعد الاتفاق علي انتظار اجتماع مجلس الإدارة

تدعوكم مدونه اطيار السنونو والطريق الى الفردوس للمشاركه فى حمله رفع الحصار عن غزه برجاء زياره الروابط للتنسيق والمشاركه

روابط دعاه حمله رفع الحصار عن غزه

ابو مصعب(اطيار السنونو)

snono.maktoobblog.com

ام عبد الرحمن(الطريق الى الفردوس)

doaa910.maktoobblog.com

فى تعليقى على استفتاء المصرى اليوم على الفيس بوك الخاص بإختيار افضل حزب يحكم مصر

احترت كثيرا بين انتمائى الحزبى السابق و الحالى

فحزب الغد يملك برنامج قوى بالفعل اراه متوازن و منطقى و به حلول عظيمه .. و لكنه للأسف بحالته الحاليه لا يصلح لأى شىء … لا يصلح ان يكون حزب من الاساس

و حزب الجبهه الديمقراطيه بالتاكيد به كوادر عظيمه و شخصيات فى غاية الاحترام.. و لكن ينقصها الخطه الموضوعيه و رغبة صادقه من قيادات حزب الجبهه لتغيير حقيقى بمصر و ليس مجرد اداء صورى هزيل .. كما انى غير متفق على نقاط جوهريه ببرنامجه تجنح نحو الرأسماليه المطلقه و الحريه المطلقه

و هذا بالطبع يختلف مع توجهاتى الوسطيه و انتمائى لفكر الطريق الثالث او الرأسماليه التدخليه

و فجاه تذكرت الافكار التى كنت انشرها بين الناس البسطاء كل يوم فى فترة الحراك السياسى قبل و بعد الانتخابات الرئاسيه.. سواء من خلال عملى مع شباب من اجل التغيير او حزب الغد

فكانت اجابتى فى استفتاء المصرى اليوم كالتالى

بالتاكيد فى الفتره الحاليه لا يستطيع أى حزب او تيار حكم مصر منفردا مهما امتلك من افضل البرامج و الحلول
فالحزب الوطنى قضى على الجميع

الحل هو جمعيه منتخبه لحكم مصر فى فتره انتقاليه مدتها عام او عامان لوضع دستور و نظام جديد يخرج بمصر من المشاكل و يعالج اخطاء الحزب الوطنى المدمره
و بعد ذلك يتم الاعلان عن انتخابات حره حقيقيه برلمانيه و رئاسيه و نقابيه

الحل هو جمهوريه برلمانيه و نظام حكم و دستور متوازنين يراعيان مصلحة مصر قبل الجميع 
و لا أفضل استثناء الحزب الوطنى من تلك الانتخابات الحره
و لكن لابد اولا من تطهيره من رموزه و قياداته القذره و محاكمتهم على ما فعلوه بمصر من تخلف و فوضى و عشوائيه و سلب و نهب و ظلم و فساد طوال 27 عاما
ثم يتم بعد ذلك تثقيف لأعضاء الحزب الوطنى من القواعد الطيبه التى لا تفقه شيئا سوى عبادة الحاكم مع محاوله لتقليل النزعات النفاقيه و الانقياديه و البحث عن المصالح الفرديه و هى تلك النزعات التى تسيطر على اعضاء الحزب الوطنى من القواعد

رابط الاستفتاء

http://www.facebook.com/topic.php?uid=18650657608&topic=4011

بقت بالنسبالى عاده يوميه .. حاسس انى مش هاقدر استغنى عنها

بقيت كل يوم لازم اشتمهم واحد واحد… كل لما الاقى نفسى قاعد جوه عربيه لمدة ساعتين فى مأساه مقرفه اسمها محور 26 يوليو.. مابعملش حاجه غير انى أدعى عليهم و اشتمهم و ساعات بشتم اللى خلفوهم و ماعلموهومش يراعوا ضميرهم

كل يوم مرتين .. من اول المهندس النصاب اللى معملش احلال للتربه علشان مايحصلش هبوط و ضرب تكاليف الاحلال فى جيبه.. (طب حتى كان يسرق من غير ما يبان)… لوزير الاسكان السابق محمد ابراهيم سليمان  اللى خد قرار انشاء كارثة المحور بدون اى دراسات او حسابات.. و طبعا كل الناس عارفه ماضى ابراهيم سليمان الاسود فى القرارات المتخلفه و السرقه و شراء الاراضى و بيعها لنفسه… و طبعا بتطول الشتيمه وزير الاسكان الحالى اللى قرر اصلاح كارثة المحور اصلاح مؤقت و كمان بدون ايجاد بديل يخفف الازمه فتحولت الازمه لكارثه… طبعا لازم افتكر رئيسى الوزراء السابق و الحالى و قرارتهم العشوائيه المتخبطه.. واحد تحس انه سكران على طول و التانى تحس انه اهبل و مش دارى بالدنيا .. و على فكره الهبل مالوش دعوه بالطول.. ده اكيد هبل طبيعى

و طبعا ما ينفعش اشتم و ادعى من غير ما نعدى على حبيبنا العبقى الملهم الحكيم صاحب الضربه.. ده طبعا ليه النصيب الاكبر منها.. المشكله انه عايز يبقى زعيم و مش عارف.. نفسه يعمل مشروع قومى لكن فاشل.. لإن ميته مش خالصه.. مش عايز يعمل حاجه للبلد  هو نفسه يعمل حاجه بإسمه و خلاص… بيدور على اى حاجه و لو فاشله علشان يلطع اسمه عليها.. اى محطات صرف صحى جايه من المعونه او اى كبارى او اى انفاق .. حتى لو مدينه جديده او طريق بدون تخطيط… اهم حاجه انه يروح يفتتحها و ينسبها لنفسه.. كإنه بيدفع فلوسها من جيبه.. مش من فلوس الضرايب اللى بندفعها او من المعونات الدوليه

حتى لو مصانع قطاع خاص المهم يلطع اسمه و خلاص.. المهم ان اعلام الحزب الوطنى سواء كان جرائد قوميه او تليفزيون حكومى بيتصرف عليهم من فلوس المصريين يقولوا ان عظمته و سموه عمل حاجات كبيره قوى.. محدش فى العالم فكر فيها قبله.. زى الكبارى و المجارى و المدن الجديده… و قال ايه احنا زمان قبل مبارك كنا عايشين من غير معجزاته.. و كان مافيش حمامات و صرف صحى

متهيألى كده خرجنا من موضوعنا عن مدينه 6 اكتوبر و المحور… اصل معلش المواضيع منفده على بعض…و بالذات مدينة اكتوبر دى و محورها لأنهم كارثه

حد تابع تصريحات المهندس حسين صبور اللى شارك فى التخطيط للمدينه قبل ما الحكومه تحولها لكارثه

التصريحات دى اتنشرت فى المصرى اليوم و بتوضح مدى العشوائيه اللى بتدار بيها مصر فى عصر مبارك

بعد حرب ٧٣ كلف الرئيس أنور السادات المهندس عثمان أحمد عثمان بتولي وزارة جديدة تتولي مشروعات التعمير، وجاء اختيار السادات لعثمان لأنه شخصية معروفة في العالم أجمع بأنه رجل المشروعات الإنشائية الكبري الناجحة سواء في مصر أو خارجها، وكان يهدف السادات من إنشاء الوزارة الجديدة إلي إعادة تعمير مدن القناة الثلاث التي دمرت أثناء حرب الاستنزاف واحتلال إسرائيل لها، فكانت مدن السويس والإسماعيلية وبورسعيد مدمرة تمامًا وهجرها أهلها،

 وأراد السادات عودتهم بسرعة من الدلتا والقاهرة وقام عثمان بإنشاء جهاز للتعمير وتولاه المهندس إبراهيم زكي قناوي وكان أحد قادة إنشاء السد العالي وهذا المهندس اختار بدوره ثلاثة مساعدين في المدن الثلاث، بعدها لجأ عثمان إلي عمل مسابقات دولية لاختيار مكاتب عالمية في التخطيط علي أن يتولي كل مكتب فائز في المسابقة إعادة تخطيط كل مدينة من المدن الثلاث، بشرط أن يشارك هذه المكاتب العالمية أخري مصرية بغرض أن يكون المكتب المصري رقيبًا علي المكتب العالمي ويكتسب منه الخبرة في الوقت نفسه، وهكذا تم إعادة تعمير المدن الثلاث،

 في الوقت نفسه كان عثمان لديه قناعة أن مصر سيأتي عليها بعض الرخاء، أي سوف تنشأ فيها استثمارات عربية وأجنبية جديدة خاصة في الصناعة، فعندما جاءت الصناعة في بداية الثورة لم تخطط لها تخطيطًا جيدًا في أماكن تواجدها، فقامت بتوزيعها حول مدن القاهرة والإسكندرية، وبالتالي أفسدت مدن حلوان وطرة وما حول الإسكندرية بيئيا، وقضي التلوث علي أكبر مدينتين في مصر ونشأت مشاكل كثيرة بسبب عدم التخطيط الجيد في أماكن تواجد هذه الصناعات، ففكر عثمان مع مستشاريه وتوصل إلي ضرورة إنشاء مدن جديدة بعيدة عن الرقعة الزراعية والمدن القائمة لاستيعاب الصناعات الجديدة، وتم اختيار أماكن أول ٤ مدن.

* أين تم اختيار أماكن هذه المدن الجديدة؟

- الأولي كانت تقع بين القاهرة ومنطقة قناة السويس، وهي مدينة العاشر من رمضان وكان الغرض منها استيعاب الصناعات التي سترتبط بالتصدير لمنطقة الخليج العربي وشرق آسيا، والمدينة الثانية تقع بين القاهرة والإسكندرية في غرب الدلتا وسميت بمدينة السادات وهي تبعد ساعة واحدة عن القاهرة والإسكندرية ووسط الدلتا، أي أنها تبعد عن ثلاثة أرباع سكان الجمهورية ساعة واحدة، أي تستطيع العمل في صناعات يطلبها المجتمع المصري، ولهذا تم اختيارها لتكون مدينة الصلب، علي أن يكون هناك مصنع ضخم للصلب وحوله جميع صناعات الصلب،

 أما المدينة الثالثة فتم اختيارها جنوب غرب الإسكندرية وهي برج العرب، والرابعة كانت جنوب غرب القاهرة، إذن كل مدينة تم اختيار موقعها بناء علي فلسفة اقتصادية، وسميت الجيل الأول من المدن الجديدة، وكما فعل عثمان مع مدن القناة فعل كذلك مع هذه المدن حيث دعا لاختيار مكاتب عالمية متخصصة من خلال مسابقة دولية مع وجود لجنة تحكيم دولية لاختيار أفضل العروض المقدمة فنيا، علي أن يشارك المكاتب المختارة مكتب مصري، فتم اختيار مكتب من السويد لمدينة العاشر من رمضان، ومكتب من هولندا لمدينة برج العرب، وآخر من أمريكا لمدينة السادات بمشاركة مكتبي الاستشاري، وانتهينا من تخطيط المرحلة الأولي في عهد عثمان.

* ماذا حدث بعد خروج المهندس عثمان؟

- كان المهندس حسب الله الكفراوي يعمل كأحد النواب الثلاثة لرئيس جهاز التعمير في مدن القناة، وتم اختياره من قبل عثمان قبل خروجه ليكون نائب وزير للمدن الجديدة وكانت المرة الأولي التي يكون فيها مثل هذا المسمي، ورأي الكفراوي اتباع سياسة أخري، حيث وجد أنه لا داعي لوجود مسابقة دولية لاختيار مكتب دولي عالمي لتخطيط المدينة الرابعة وكانت ٦ أكتوبر، وقام بتكليف أحد أجهزة الوزارة لذلك، وهنا يأتي الحديث عن شيء مهم جدًا وهو كيفية اختيار موقع مدينة جديدة، فهذا له دراسات تخطيطية كثيرة منها ألا تكون علي أرض زراعية وأن تكون أرضًا صالحة للبناء، وأن تكون علي بعد معين من المدن القائمة بحيث لا تكون ضاحية كمصر الجديدة وحلوان، فإنشاء مدينة جديدة للصناعة يجب أن يسكنها العاملون بالصناعة، فضلاً عن الخدمات الأخري المختلفة، فهناك معايير كثيرة للاختيار كأن تكون بعيدة عن القواعد العسكرية مثلاً، وكانت اختيارات مدن السادات والعاشر وبرج العرب وفقًا لهذه المعايير، إلا مدينة ٦ أكتوبر.

بعد سنة تقريبًا اقتنع الكفراوي بأن معدل إنجاز جهاز التخطيط في الوزارة بطيء للغاية في ٦ أكتوبر، فقرر أن يستبدله بمكتب مصري حيث كان يرفض الاستعانة بالأجانب فسأل عن أفضل مكتب مصري يعمل مع المكاتب العالمية في تخطيط باقي المدن، وجاءت الإشادة لصالح مكتبنا، وتم استدعاؤنا وسلمنا مسؤولية التخطيط كاملة في المدينة بمفردنا، ومع بدء التخطيط اكتشفنا أن المدينة لا تصلح تمامًا من حيث الموقع حيث لا تنطبق عليه معايير المدينة الجديدة، حيث يمر موقع المدينة فوق خط «سوميد» وهو الذي ينقل البترول من السويس إلي غرب الإسكندرية، وكأن الوزارة لم تجد أي مكان خالي في صحراء مصر الممتدة حتي ليبيا إلا هذا الموقع، فالذين اختاروا الموقع لم يكتشفوا ذلك،

إضافة إلي أن المدينة تمر فوق خطوط الضغط العالي وهي من أخطر المواقع للبناء تحتها وحولها، ودائمًا لابد من البعد عنها بمسافات معينة، فضلاً عن أن الأرض طفلية ولا يصلح عليها البناء إلا بتكاليف باهظة، كما أن المسافة بينها وبين القاهرة تجعلها ضاحية وليست مدينة جديدة، وكتبنا هذا كله في تقرير واقترحنا نقل موقع المدينة إلي مكان آخر، وقمنا بتسليم التقرير للمسؤولين، ولم يؤخذ برأينا وطلبوا استكمال التخطيط، فقمنا باستكمال التخطيط لمدينة ولدت «عرجاء»، وأخطر ما حدث فيها أن قربها من القاهرة جعل من يعمل فيها لا يعيش بها، وعندما ازدحمت القاهرة بسكانها قرر البعض العيش فيها وهم لا يعملون بها،

وهذا ما شكل ضغطًا عالياً من الانتقال الذي لا داعي له، ومع هذا بدأ ظهور «موضة» من المنتجعات السكنية الجديدة بإنشاء فيلات رخيصة الثمن نسبيا، وأقبل عليها الكثيرون، أيضاً لأنها قريبة من القاهرة وكان سعر الأرض رخيصًا نسبيا آنذاك انتقلت إليها أنشطة لا داعي لوجودها في مدينة صناعية مثل الاستوديوهات والجامعات والمستشفيات الكبري، ولم تعد المدينة صناعية فقط، ولكنها أصبحت متعددة الأنشطة، وكل نشاط نشأ ولد حركة انتقال جديدة بين القاهرة والمدينة، وذلك لسوء اختيار الموقع من البداية علي العكس من مدينة السادات،

وكان محور الانتقال إليها عن طريق الملك فيصل الذي كان مزدحما بما يكفي، فقررت الدولة إنشاء محور ٢٦ يوليو بسرعة شديدة للتخفيف علي الطريق الآخر وما لبث، إلا أن اكتظ أيضاً بالمرور بسبب الحركة الزائدة علي المدينة، خصوصا أن هذا المحور الجديد هو نفسه محور الوصول إلي طريق الإسكندرية الصحراوي، وتنشئ الدولة اليوم محورًا جديدًا للتخفيف علي هذا المحور، ولو اكتظ المحور الجديد بعد عدة سنوات ستفكر الدولة في إنشاء آخر وكل محور بملايين الجنيهات، فكل هذه الحلول ناتجة عن سوء اختيار موقع المدينة من البداية.

* لكن كيف تم البناء حول خط «سوميد»؟

ـ كان هناك خطورة فعلية علي المدينة في حال حدوث انفجار للخط، فضلاً عن الخطورة علي الخط نفسه من وجود مدينة حوله، ودارت مباحثات طويلة بيننا وبين المسؤولين عن الخط حتي نعمل ضوابط لكيفية البناء حول الخط وما الذي نبنيه، وكان المسؤولون عن الخط رافضين تماما إنشاء المدينة، ولكنها كانت تعليمات الدولة، وقمنا بعمل أفضل ما نستطيعه في موقع خاطئ

و ده طبعا كلام المهندس حسين صبور عن انعدام التخطيط السليم و العشوائيه التى تدار بها مصر

اهم حاجه انى لما بشتم و بادعى كل يوم على الناس دى بلاقى كل اللى فى العربيه بيرددوا وراي

ghostyا   

نفسى اشوفك يا معفن

انا كنت الأول فاكره محترم … و كنت ملتمس ليه عشرات الاعذار

قلت مش معقول حد ييجى يسكن هنا و يكون معفن كده.. اكيد معذور ..يمكن علشان مافيش صناديق للزباله قريبه بيضطر يرمى زبالته جنب العماره اللى انا ساكن فيها.. و خصوصا انها اول عماره قدام المدخل و كله بيعدى عليها… انا عن نفسى كنت بامشى مشوار طويل كل يوم الصبح  لغاية أقرب صندوق

لغاية ما الموضوع تحول لمشكله مع تراكم اكوام الزباله فى الشارع و بقت العماره اللى انا ساكن فيها هى العماره الوحيده فى القاهره الجديده كلها اللى جنبها كوم زباله

بدات ابعت شكاوى لجهاز المدينه و لجرايد كتير و اشترك فى الموضوع ده سكان كتير من عمارتنا و كذا عماره تانيه

و كانت مطالبنا  و شعاراتنا موحده ..” عايزين صندوق زباله كبير قريب مننا” .. “عايزين نشوف فلوس الزباله اللى بندفعها كل شهر بتروح فين”  .. “الحكومه هاتعود الناس على رمى الزباله فى الشارع”

و اخيرا بعد احتجاجات و شكاوى كتيرفى جهاز المدينه قاموا بوضع صندوق كبير يخدم كذا عماره.. و العمال بقوا ينضفوا الصندوق كل يومين … قلنا الحمد لله اخيرا بتوع الجهاز بقى عندهم دم و احساس

المشكله مش فى كده … المشكله انى كنت فاكر انه محترم و مش قادر يمشى لغاية الصندوق البعيد … دلوقتى برضه بيرمى الزباله جنب العماره رغم ان الصندوق بقى قريب جدا

نفسى اعرف ايه احساسه لما بيلاقى ان هو الوحيد اللى بيرمى الزباله فى الشارع  رغم ان فيه صندوق قريب

و هل هو معفن من زمان ولا ده جاله قريب  … طب هل يا ترى دور على علاج؟

هل اللى عنده ده ادمان ولا متعود على كده قبل ما ييجى الاقهره الجديده

اسئله كثيره تدور فى ذهنى كل صباح  .. نفيى ايألها للشخص المعفن ده

نفسى بجد اشوفه

يا ريت لو حد يسلفنى كاميرا للمراقبه علشان اعرف هو مين

و ساعتها هيلاقى صورته متعلقه بالحجم الطبيعى فى نفس المكان اللى بيرمى فيه زبالته .. علشان يتفضح فى المنطقه كلها

و كمان انا ناوى لما اعرف عنوانه ارمى زبالتى و زبالة الجيران قدام باب شقته

ghosty

ماهرى حتى النخاع

لتحميل الحوار الرائع و الجرىء لإبراهيم عيسى على الجزيره مباشر إضغط على الرابط التالى

الزملاء الاعزاء

اعترف لكم فى تلك اللحظه بسذاجتى المفرطه

فقد صدقت الحزب الوطنى فى اكاذيبه

فقد اعلن وزير اتصالات الحزب الوطنى عشرات المرات  ان تركيب تليفون ارضى اصبح اسهل من التنفس الطبيعى… طبعا طبقا لتوجيهات السيد الرئيس و برنامجه الانتخابى

و انه يكفى ان اذهب للسنترال حتى يتم تركيب تليفون ارضى بعد 48 ساعه على الاكثر

للاسف صدقت و كذبت عقلى اللى قاللى ان ديل الحزب الوطنى عمره ما هايتعدل

و روحت سنترال القطاميه الالكترونى الجديد  .. وقدمت طلب

ايوه قدمت طلب زى باقى الناس

و فرحت لإن السنترال كان فاضى .. و حمدت ربنا انى ساكن فى التجمع الخامس مش فى فيصل … اخيرا شوفت سنترال فاضى

و قاتلولى تعالى بعد اسبوع … قلت ماشى

قالولى لاول مره فى مصر ممكن ترفض تركيب عدة الحكومه اللى تمنها 275 جنيه رغم انها عده معفنه … قلت قشطه

و تعاقدت على خط .. ايوه تعاقدت على خط

صحيح هما قعدوا مذنبينى فى طابور انا اول واحد فيه لمدة ساعه .. لكن برضه عذرتهم .. برضه لازم ياخدوا وقتهم علشان يتخلصوا من تاخيرهم و تعذيبهم للناس

و كمان قالولى التركيب بعد يومين

والله ماصدقت نفسى

و اخدت يوم تركيب الخط  اجازه من الشغل

و محدش جه

قولت اكيد ليهم عذرهم

احنا فى رمضان و انا ساكن فى مدينه جديده و المشى فى الصحرا صعب فى الصيام “نسيت اقول ان الكلام ده كان فى بداية رمضان” و يمكن فنى التركيب  تاه فى الصحرا

اتصلت بيهم .. قالولى معلش… استنى بعد بكره

و اخذت اجازه تانى ..  و برضه محدش جه

و اتصلت و قالولى بعد بكره

و برضه محدش جه

اتكرر الموضوع ده اربع مرات

لغاية ما اخدت اجازه و روحتلهم السنترال

لقيت الموظفين مأنتخين و شبه نايمين .. و معظمهم مزوغ و فنى التركيب عمال يهرب منى و يقول مش فاضى …اصلهم صايمين

عملت مشكله. و هددت بإنى هاخرج من السنترال و هاعمل مظاهره لوحدى قدام وزارة الاتصالات

قام المدير بعت معايا الفنى

ووصل السلك

اخيرا

و للاسف كانت المفاجأه اللى كان لازم اتوقعها فى ظل الحكومه الالكترونيه …الحراره ماجتش رغم مرور حوالى شهر على التعاقد.. اصل فيه عطل فى خطوط السنترال الالكترونى الجديد الغير مسبوق فى تاريخ مصر

اتصل بينا بكره

و اتصلت

مره و اتنين و عشره.. من  سذاجتى

و فى الاخر قالوا بعد العيد بقى و كل سنه و انت طيب

والله اعلم

العيب مش على الحزب الوطنى … العيب على اللى يصدقه

الزملاء الأعزاء

بعد اكتشافى كم كنت ساذجا و ان الحل الاصلاحى صعب مع هذه الحكومه

اعلن لكم و لهم انى سأعطيهم فرصه اخيره لمدة ثلاثة ايام من بعد العيد و بعدها…..

سأتوجه وحدى لوزارة الاتصالات …. و هناك هايشوفوا اللى عمرهم ما شافوه

ملحوظه

تم إلغاء التهديد الأخير مع إنى فعلا كنت ناوى اعمله… لكن حظهم حلو.. الحراره جت

ghosty

ماهرى حتى النخاع

يعلم العديد من الزملاء رؤيتى للتغيير و التى هى قد تكون سبب لإعادة نشر المقاله

فأنا أميل للتغيير الإصلاحى السلمى الذى يأتى عن طريق صندوق إنتخابات ديمقراطيه حقيقيه تتميز بالشفافيه و التنافس الشريف و تزيل النظام الحالى و تضع حكومه إئتلافيه مؤقته و تضع دستور جامع يراعى مصالح مصر اولا  و يتفق عليه الجميع

و بالطبع هذا حلم بعيد المنال غير واقعى لن يتحقق بالتاكيد فى ظل النظام القمعى الحالى و القوانين الحاليه و الدستور الحالى و مجلس الشعب الحالى و النواب الغير منتخبين الحاليين

و لن يتحقق كذلك بسبب شعب جاهل لا يعرف أساسا ما هى فائدة الاحزاب ولا الديمقراطيه  ولا معنى تداول السلطه ولا يرى اهميه لحساب الحكام و المسئولين  ولا تهمه تلك المسميات اساسا فى شىء … لا يهمه إن كان يسكن بين تلال القمامه أو يعيش على الكفاف.. المهم انه يعيش

لن يتحقق التغيير الإصلاحى فى وجود معارضه مثل الموجوده حاليا … فهى اضعف من أن تتخذ قرارا موحدا أو ان تتفق على شىء

معارضه متناحره يبحث كل تيار و حزب فيها عن مصالحه الشخصيه الوقتيه و يرفض الإتحاد و التحالف لإسقاط نظام يذبح الجميع… معارضه تتصيد الخلافات و الإختلافات و تعمى أبصارها عن اى نقاط مشتركه

يبقى إذن الحل الثورى و المظاهرات المليونيه التى ستحتل ميدان التحرير و تتحرك صوب قصر العروبه … ذلك الحل الذى يبشرنا به الزملاء الثوريين و “هم يعلمون مدى حبى و تقديرى لأشخاصهم و إخلاصهم لأفكارهم”… و هو حل بصراحه .. أراه منطقى حاليا و بديل موفق فى تلك الظروف و مع تلك السلطه التى لا تعرف سوى لغة القوه

و لكن أولا…لابد للثوره من شعب يقوم بها

و شعبنا لا يهمه الإستبداد المهم عنده الاكله و النوم و النومه حتى لو لم يضمن اى منهم ليوم تالى

حتى لو لم تتوفر تلك الإحتياجات الاساسيه للبقاء فسوف يتكيف شعبنا و يستطيع العيش بدونها

فصحيح ان الجوع كافر لكن الجبن و الجهل الذى تربى عليه شعبنا طوال خمسون عاما اكثر كفرا و سيطره

شعب متعصب استبدل عدائه للقوه الخارجيه المهيمنه و السلطه الداخليه الناهبه و السارقه .. بعداء لبعضه و لذاته

فاصبح التعصب الان من سمات المصريين بدلا من التسامح الذى كنا نسمع عنه قديما

فاصبحنا نسمع الان عن فتن طائفيه و صراعات قبليه و عرقيات و تعصب ايدولوجى .. حتى الاهلى و الزمالك أصبحوا كالديانه بالنسبه للمصريين

شعب لا يستطيع الثوره ولا يهمه تغيير وضعه فى شىء

و معارضه لا تستطيع قيادة الجماهير و غير اهل لثقة الشعب اساسا

و سلطه عندها من القوه بحيث تستطيع قمع اى بوادر ثوره

لا تكلمنى عن شعبنا الواعى و نضاله التاريخى فى عصور مختلفه شهد بها العالم  .. فأنت إذا تتكلم عن شعب غير الشعب الحالى و جيل غير الجيل

لا تحدثنى عن شرارة الثوره التى ستخرج من احد المصانع الصغيره و تجتاح مصر من اسوان للاسكندريه .. فانت اذا لاتتحدث عن ثوره بل تتحدث عن انتفاضه للجياع و فوضى ستقتلع الاخضر و اليابس لن يستطيع احد ايقافها .. لأنها ستكون ساعتها جسد بلا رأس و عقل يحركها

طب و الحل

الحل من وجهة نظرى المتواضعه هى مشروع توعيه  و تحريض و قيادة لذلك الشعب قد يستمر شهور أو سنوات

توعيه باهمية الديمقراطيه و ثقافة قبول الاخر  و كيفية تداول السلطه و اهمية حساب المسئولين

تحريض و تشجيع للمطالبه بالحقوق فى كل مشكله و كل مناسبه و كل مواجهه للجماهير مع السلطه

قياده مسئوله و تثق الجماهير بها قد تكون شخص او حزب او تيار لتنظيم حركة الجماهير سواء جزئيه او كليه

و لعلنا نتذكر انه فى السنوات الاخيره خرجت جماهير الشعب فى دول كثيره لخلع سلطات مستبده و تعيين أحزاب غصلاحيه بدلا منها

أى ان فكرة الثوره الشعبيه ليست مقصوره على التيار الماركسى فقط أو اليسار بصفه عامه و لكن الثورات الشعبيه تلجا إليها بعض الاحزاب الليبراليه او ما شابه .. كطريقه مثلى للتغيير فى ظل نظام استبدادى قمعى 

أرجوا ألا اكون قد أسأت لاحد من الزملاء الذين يعلمون بالتاكيد مدى احترامى لهم  .. و لكن اعتقد اننا يجب ان نراجع انفسنا من اوهام تفكك الدوله الوشيك و الثوره الشعبيه القادمه و الشعب الواعى الذى يفاضل بين  و بين 

ghosty

 المقاله الأصليه لدكتور عمرو الشبكى التى أثارت استياء الزملاء الإشتراكيين

وهم الثورة الشعبية 

 بقلم  د.عمرو الشوبكى    //٢٠٠٧

لم تعش تنظيمات وحركات سياسية علي فكرة، مثلما عاشت علي حلم الثورة الشعبية والعصيان المدني، بصورة أدت إلي إنهاء بعضها وتعثر البعض الآخر حين اختزلوا قضية التغيير في نموذج واحد من المستحيل حدوثه، وفي الرهان علي حاله جماهيرية لن تأتي، وتركت مساحات أخري للعمل كان يمكن أن تأتي بثمارها في حال تخلصت حركة مبشرة كحركة كفاية من هم صدرته الأدبيات الماركسية التقليدية في الثورة والتغيير الثوري، ومثل ليس فقط جزء من ذكريات الماضي إنما أيضا استثناء نادر في تاريخ خبرات التغيير في العالم، بما فيها البلدان الشيوعية السابقة في أوروبا الشرقية، والتي لم تذهب إلي الشيوعية بثورة، ولم تغادرها أيضا بثورة.والسؤال المطروح علي القوي الإصلاحية الجديدة، وخاصة التي كانت واعدة منها يكمن في البحث عن طرق ووسائل جديدة للتغيير والإصلاح، تتجاوز خطاب الثورة القادمة ومظاهرة المائة ألف مواطن، وعصيان الملايين في الشوارع، لأن الهدف هو الإصلاح وليس العصيان المدني.لقد دافع البعض عن نموذج استثنائي في تاريخ حركات التغيير في العالم، فباستثناء الثورة الفرنسية والروسية والإيرانية لم ير العالم ثورات شعبية كبري تتحرك فيها الجماهير من أجل إسقاط النظام القائم، فدول أوروبا الغربية تحولت نحو الديمقراطية عبر عملية تطور داخلي عرفت أشكالاً متنوعة من الاحتجاجات الشعبية مثلت عنصر ضغط علي النظام دفعت قوي وتيارات إصلاحية من داخله إلي إجراء إصلاحات متدرجة شكلت ما عرف بالثقافة السياسية الديمقراطية لمعظم بلدان أوروبا الغربية. أما البلاد التي شهدت تحولا «متأخرا» نحو الديمقراطية كالبرتغال وإسبانيا، فهي لم تكن أيضا نتيجة ثورات شعبية أو عصيان مدني، إنما كانت عبر تراكم لاحتجاجات شعبية متفرقة، شبيهة بالتي نشهدها في مصر الآن، ودفعت بقوي إصلاحية داخل النظام إلي تبني الديمقراطية، معتمدة في ذلك علي دعم جيرانها الأوروبيين لهذه الديمقراطية الوليدة.

 كفااايه فيفى عبده … بااااطل يسرا … حرااااااام
دى هتافات ببقى عايز اهتفها كل يوم بعد الفطار لما بحس بالتشنجات اللى بتجيلى لما حد بيجيب اى مسلسل للحثاله دول
السنه دى حاولت استحمل علشان اراعى مشاعر و ذوق الناس اللى بتتفرج معايا على التليفزيون
لكن برضه مستحملتش
السنه دى جاتلى تشنجات اصعب و لقيت رقبتى بتحدف شمال
شوية ممثلات عواجيز اكل الدهر عليهن و شرب و عمل حاجات تانيه مش هاقدر اقولها علشان انا صايم .. مثال للحثاله و الزباله فى حياتهن الشخصيه بيحاولوا يمثلوا أدوار ملايكه مثاليين
كل واحده منهن عامله دور خضره الشريفه اللى هاتصلح الكون
المشكله ان مسلسلاتهم مافيهاش اى قيمه .. دى مجرد سبوبه ليهم بيحاولوا بيها يرجعوا للشاشه بعد لما الناس زهقت منهم و من قرفهم
انا بجد كرهت زعيق ناديه الجندى و معاركها الوهميه للدفاع عن الفضيله .. و عياط الهام شاهين و مناخيرها الحمرا كل سنه
و نهيق فيفى عبده و جهلها حتى فى التمثيل
كله كووووم و يسرا كووووم
يمكن المسلسل اللى تابعته شويه مع “حماده عزو” هو مسلسل” قضية رأى عام”
قلت يمكن تكون يسرا عايزه تقول فكره محترمه المره دى
و بالفعل تناسيت تشنجاتى منها فى السنوات السابقه و قلت اديها فرصه تانيه
و بالفعل اعجبتنى فكرة المسلسل و بدات انفض لاخطائه
نفضت فى البدايه لكونهن طبيبات محترمات و تم اغتصابهم… اعتقد ده مابيحصلش
معظم قضايا الاغتصاب اللى الواحد سمع عنها بنلاقى فيها ان واحده ماشيه لوحدها بعد نص الليل و لابسه ملابس مستفزه و مثيره جنسيا
و نفضت لحكاية انهم نزلوا بالعافيه من عربيه مع انى اعتقد ان ده صعب
و نفضت لحكاية ان المغتصبين ناس متدلعه مش عندهم كبت جنسى
و لما لقيت اهتمام ظابط المباحث بالقضيه قلت عادى يمكن علشان هى دكتوره كبيره
و لما لقيت الظابط محترم مع انه ظابط مباحث .. قلت عادى يمكن المسلسل بيحكى عن ظابط المباحث المحترم الوحيد فى مصر
او يمكن بيحكى عن نموذج يتطلع اليه كاتب المسلسل
اهو برضه فيه ظباط محترمين بنلاقيهم فى الترحيلات او السياحه او المطار يمكن نقلوا واحد منهم للمباحث قريب
لغاية ما لقيت الظابط بيستمر فى التحريات عن ابن الوزير
دى بقى واسعه
ه لو ابن ملازم هايداروا عليه
احنا فى مصر بلد المعجزات
شويه الاقى الواد يتقبض عليه
و الاقى العدل بياخد مجراه
و الواد ابن الوزير بيترمى فى زنزانه عاديه و ده مستحيل فى مصر حتى لو اتقبض عليه فعلا
و قال ايه كل الوزرا الشرفاء باعوا الوزير ابو الواد
ووكيل النيابه بيطيق القانون
دى بقى اللى مفدرتش استحمل عندها
انا شوفت بعينى ظابط امن الدوله بيتصل برئيس النيابه و يسب له الدين فى التليفون لو ماقالش حاضر يا فندم او حاول يفرج عن معتقلين بدون تهم
و تلاقى التليفونات من النائب العام شخصيا بتهدد و تتوعد وكيل النيابه لو فكر فى الافراج عن الابرياء
و ادينا اهوه بنشوف مجاملة النيابه و الطب الشرعى لظباط الشرطه اللى بيعذبوا و بيقتلوا ابرياء
انا اتاكدت ان المسلسل ده متألف من ظابط امن دوله بعد مشهد اثار التعذيب اللى العيال عملوها فى نفسهم و ازاى الجرايد بتكتب و بتشوه صورة الظباط لملايكه
كفايه كده عن يسرا لإن رقبتى قفشت و بتحدف شمال و انا قاعد بكتب دلوقتى
نيجى بقى ليحى الفخرانى و يوسف معاطى
و الاتنين بعتبرهم من العمالقه
و بحب كتابات يوسف معاطى الساخره من سنين
لكن شكل علاقته و صحوبيته الجديه بعادل امام اثرت على افكاره و مبادئه
قال ايه ظباط امن الدوله ملايكه و بينصحوا الطلبه انهم يبطلوا مظاهرات … و كمان بيتكلموا من غير سب دين و شتيمه
و كمان بيستدعوا اهل المعتقلين و يسلموهم ابنائهم … يا سلام يا سلام
و قال ايه الطلاب اللى بينزلوا مظاهرات معدقين نفسيا و بيكرهوا المجتمع و الحكومه الطيبه و بيكسروا فى البلد
و كمان اسمهم حركة طلاب من اجل التغيير
يعنى حركه كانت موجوده بالفعل من سنتين

بصراحه
مافيش غير تامر و شوقيه … اهو هجص بس بتكون عارف قبل ما تشوفه انه هجص

ghosty

ماهرى حتى النخاع

طبعا كلكوا عارفين انا بحب رئيسنا العظيم “حسنى مبارك” إزاى – حفظه الله و رعاه من شر المرض و الموت – علشان كده هاكلمكوا عن بعض افكاره العبقريه اللى محدش وصل ليها قبل كده لا في الماضى و لا في المستقبل

هاستكمل الاول كلامى عن المدن الجديده .. و دى اول اختراعاته اللى الدول المتقدمه لسه ما وصلتلهاش… و بما انه بينسب كل حاجه لنفسه و لعبقريته و حكمته الغير مسبوقه يبقى المفروض انه يتحمل كل شطحاته و سوء ادارته و سوء اختياره للحراميه قصدى للمساعدين و جهله – يوووه انا اسف نسيت إن اللى بيتكلم دلوقتى عنه بيتحبس … طيب هحاول ماغلطش فيه لكن مع التذكير انه بشر عادى مش إله

و بما انى مهندس مدنى فأكيد عندى معلومات عن شىء اسمه هندسة التخطيط

فمثلا أى مدينه جديده بيتخطط لها بيكون فيه حاجات كتير اهم من الشوارع الواسعه و الجناين … المفروض بيتحسب عدد السكان هايكون كام بعد عشرين سنه أو اكتر و يتعمل حساب مواسير المياه و الصرف على كده مع ترك امكانيه للزياده عند الحاجه …. و كمان بيتحسب عرض الشوارع المناسب لأى زياده مستقبليه و بيتساب حرم للطريق لسهولة توسيعه عند الحاجه و كمان بيتعمل رصيف عريض و كبير… و طبعا بيتحسب اماكن الانتظار و شبكة المواصلات الداخليه و الأهم من ده كله هو الطرق الموصله للمدينه و بدائلها عند الطوارىء.. و يمكن يكون منكم حد يسمع عن تخصص اسمه هندسة النقل والمرور و ده علم مهم جدا في الدول المتقدمه و احد فروع الهندسة المدنية .. و مهندسين المرور بيكون من ضمن عملهم انهم يحسبوا على الواقع عدد السيارات بجميع انواعها و اتجاهاتها وكمان أعداد المشاه في جميع الاوقات خصوصا أوقات الذروه و المواسم لجميع الاماكن داخل المحافظه الواحده ثم الحى الواحد ثم المنطقه الواحده و يربط كل دول ببعض و يخطط اماكن اشارات المرور ووقت الإشاره و الاماكن اللى محتاجه كوبرى أو محتاجه نفق سيارات أو نفق مشاه و كمان بيحدد شبكة الطرق و عرض الطريق و امكانية توسعته … و كله بيكون بالحسابات الدقيقه جدا جدا … المشكله انه في مصر بيكون على مزاج الرئيس علشان يزعم بعد كده انها انجازاته اللى نزلها عليه الوحى … و الاسخم إن التحكم في المرور و الاشارت و التدفق متروك لعسكرى الشرطه الغلبان و ظباط وزارة الداخليه اللى بيكونوا جايبين خمسين في الميه في الثانويه العامه و كل اللى يفهموا فيه هو إزاى يعذبوا الناس و يقرفوهم

طب نسال نفسنا سؤال … ليه في مصر مفيش تخطيط و ليه كله ماشى بالبركه و ليه رجال المرور ال…… (تم حذف الشتيمه بسبب الصيام) هما اللى بيتحكموا في تخطيط و إدارة المرور مش مهندسين المرور أو المهندسين المدنيين

هاقولك جزء من الإجابه لضيق وقتك ووقتى .. الكبارى عندنا مش بتتعمل طبقا لإحتياجات تدفق المرور .. دى بتتعمل علشان الرئيس يروح يفتحها و يسميها معجزات .. رغم اننا محتاجين اضعاف ما هو موجود من كبارى و انفاق لتحقيق سيوله مروريه و رغم إن كل المشروعات دى من فلوس الضرايب اللى بندفعها في كل الخدمات يعنى من فلوسنا مش هبه ولا هديه من مبارك

و كمان لإن وزارة الداخليه هي اللى بتحكم مصر في كل حاجه فبدل ما تستكفى بتطبيق القوانين في المرور … لأ دى كمان هي اللى بتدير المرور و بتخططه علشان كده فاشل زى ما هما فاشلين (لاحظ انى صايم و بحاول ماشتمش)

خد مثلا عندك مدينة 6 اكتوبر .. اهى مدينه جديده و كل يوم عدد السكان فيها بيزيد ززز و مليانه عشرات الجامعات الخاصه و المعاهد و مئات المصانع .. و رغم كده مافيش فيها أى مواصلات داخليه .. يا إما تركب تاكسى يستغلك يا إما تستنى ميكروباص و إنت و حظك … و لعبقرية مبارك تلاقى إن 6 اكتوبر و زايد مالهومش مدخل غير المحور … و ده عباره عن طريق طويل حوالى عشرين كم و متقسم 3 حارات و في الأخر بيصب عليه الطريق الدائرى و في اوله بيصب الطريق الصحراوى و اللى جاى من الهرم .. و بعد ده كله تلاقيه اتحول حارتين و بيصب في شارع جامعة الدول أو كوبرى 26يوليو … و طبعا شارع جامعة الدول أو الكوبرى دايما زحمه فبيخلى المحور بطىء من اول تقاطع المحور مع الدائرى.. و يا سلام بقى لو حصلت حادثه على المحور أو عربية عطلت فجأه .. تلاقى المحور كله واقف لإنه طبعا طبقا للتخطيط العبقرى مالوش اى منزل أو مخرج أو مطلع و لا فيه اى خدمات ولا حتى محطة بنزين واحده

دا غيرإن اساسا اساسا – المحور نفسه مرصوف غلط و تحتيه تربه طفليه بتهبط مع الوقت .. ولا حد عمل إحلال للتربه و لا حد طبق اى قواعد هندسيه … و دلوقتى بيصلحوه رغم كل المشاكل اللى بتحصل و هو سالك فما بالك بقى بأول موسم الدراسه و شهر رمضان… يبقى العمليه اكيد عذاب و جحيم يومى للطلاب أو العاملين باكتوبر

يعنى خلاصة الرغى ده كله إن المشاريع دى كلها سواء مدن جديده أو طرق أو مشاريع بنيه تحتيه هي تطور طبيعى و غحتياجات سكانيه مش هبه و لا عبقريه من حد .. و عن مبارك بينسب ده لمعجزاته و كراماته .. و بسبب انه كذاب و نصاب و حواليه نصابين فبتطلع المشاريع بايظه و فاشله و بيبان إن تفكيره عشوائى و فاشل

يعنى المفروض انه يتحاسب عن غباؤه و فشله سوء إدارته

و لنا في الحديث بقيه عن الإنجازات الفاشله و كله من برنامجه الإنتخابى اللى قرفونا بيه

ghosty

 ماهرى حتى النخاع …. و لتسقط كل الاصنام

اللافتات التى تم تعليقها من أعضاء حزب الغد بالبحيره فى عز الظهر

صور جنود أمن الدوله البواسل أثناء موقعة تقطيع لافتات حزب الغد دون غيرها

نقلا عن موقع غد اون لاين و مدونة د/أحمد ميلاد و مدونة د/احمد الفيشاوى

http://ahmed-melad.blogspot.com/

http://www.elghadonline.com/vb/showthread.php?t=296

www.hyatfish.blogspot.com

 تساؤلات من أحد الأطباء حول شهيد التعذيب فى شها

نبص مع بعض على الصورة رقم 1

هتلاقى حول العين الشمال جلد لونه فاتح و أفتح من اللى حوليه ده بيحصل لما يكون الجلد ده جديد ولسه ما أتعرضش للشمس. وبعدين المنطقة اللى حواليه ىمفيش فيها لون أزرق يعنى مافيش كدمة يعنى ديه مش ضربة مباشرة …!!!أمال ده ايه…… أتسحل على وشه…؟؟؟؟؟؟ لأنها لو خبطة يبقى لازم يبقى حوالها كدمة…؟؟؟؟

بص للصورة رقم 2

لما نبص فى الصورة بلاقى الانبوبة داخلة من أعلى فى الصر (جنب اللون الاخضر)  لكنمنينوده بيستعمل لإفراغ الهواء ليه بقى  لأنالهوا بيطلع فوق  فتبقى  الانبوبة راكبة فوق المية بتنزل تحت  فتبقى الانبوبة راكبة تحت والنبوبة راكبة فوق يبقى بتصفى ايه…هوا …اسم الله عليك

بص كدة للصورة رقم 3

بص كدة على لوح الكتف وقوللى هتلاقى ايه…؟؟؟ جلد لونه فاتح و أفتح من اللى حوليه ده بيحصل لما يكون الجلد ده جديد ولسه ما أتعرضش للشمس. وبعدين المنطقة اللى حواليه مفيش فيها لون أزرق يعنى مافيش كدمة وخد بالك أن الجلد الفاتح هنا عامل زى مايكون خط مستقيم

علىالحافة الداخلية للوح الكتف وخد بالك أنها متوافق مع وضع الذراع وهو مضموم بجانب الجسم  من الامام يعنى الولد ممكن وبقول ممكن أو غالباً انه اتسحل من رجليه وايديه كانوا مربوطين من الامام .طب ليه مانقولش أن انه أتسحل من أيديه لأنه لوح الكتف ساعتها بيقى مايل أكتر من كدة بكتير(كأنك لرافع أيديك لفوق) وكمان اللى بيبقى معرض للأرض ساعتها مساحة كبيرة من العضلات فى لوح الكتف مش حافة لوح الكتف الداخلية…..!!!!!.

نبص كدة على الصورة رقم 4:

هنلاقى حتة لونها غامق جداً عامل زى مايكون متفحم وبعدين الحتة دى محددة المعالم  ده ايه…؟؟؟!!!!د ه حرق ولّا ايه بالضبط…؟؟؟!!!

طب بص كدة على الصورة رقم 5

هتلاقى قرحة صغيرة محددة عاملة زى ماتكون حاجة محددة و “حديثة”(لأن الجلد بتاعها ملحقش يتلون وياخد لون بقية الجلد)وبعدين الحاجة اللى عملتها مش سحل لاء دى حاجة صغيرة وحديثة..!!!

بص كدة على الصورة رقم 6

دى زى الصورة رقم 5 بالضبط بس دى  موجودة تحت الخصية   (أسمه الدقيق كيس الصفن) دى مستحيل تكون حاجة قديمة ومش ممكن تكون سحل برضه “دى حاجة محددة جداً جدا وحديثة أيضاًً”

بص كدة على الصورة 7

شوف ال 3 حتت اللى داخلين لجوة دول ايه ..؟؟؟ دى حاجات غير حادة ومكان دى حاجات مش صغيرة . ةهم الصراحة أكتر من 3 بس خالينا فى دول الاول.بص عليهم فى صورة 7 وصورة  7 A  وبعد كدة بص عايهم فى الصور من 7 A إلى 7 F وقوللى ايه رأيك وليه الصور دى عاملة زى ماتكون رجل بنى آدم وكمان زى ماتكون رجله الشمال( بص كدة على الصورة 7 G وتخيل لأن ده أثر رجل فى الطين وهتفهم أنا قصدى أيه بالضبط)…..؟؟؟؟!!!!!!!!!!!!!!!

طب بص كدة كمان بص على 7h وقوللى يا شيخ بأمانة ربنا مش ده كدة منظر  أثر لجزمة وكمان من النوع اللى على الموضة( أبو بوز طويل) و لّا لاء

بص كدة على صورة رقم 8

وقوللى ايه أسباب الكشطة دى …؟؟؟ مش ده منظر جلد مكشوط وطلع مكانه جلد جديد ولّا لاء …..؟؟طب ايه سببه…….؟؟؟؟!!!!!! وأبقى أرجع تانى بص على الصورة رقم 7 وقوللى أيه سبب المساحات الكبيرة دى من الجلد المكشوط ده..؟؟؟؟؟

طب بيجى لجملة هبوط حاد فى الدورة الدموية والتنفسية(اللى هى بيقولوا أنها سبب الوفاة):

أساساً الهبوط الحد فى الدورة الدموية والتنفسية ده ممكن يكون لأى سبب بمعنى:

ممكن يكون الواد أنضرب وحصل له نزيف داخلى أدى إلى هبوط الدورة الدموية والتنفسية

وممكن يكون أتكسر له ضلع فلما يتكسر ضلع ممكن يحصل قطع فى الغشاء البلورى ويحصل حاجة زى وصلة بين الفراغ البلورى و الهواء داخل الرئة  وبعدين الهواء اللى دخل الفراغ البلورى يتراكم ويزيد مع التنفس(ولابد من إخراجه عن طريق وضع قسطرة أو أنبوبة توضع فى أعلى مكان فى الصدر  تقريباً زى اللى فى صورة 2 عند الدايرة الخضراء) وبعدين الهواء اللى دخل فى الفراغ البلورى يمنع الدم أنه يرجع من القلب للعروق  (Impaired venous return)  وده كمان بيعمل هبوط حاد فى الدورة الدموية والتنفسية

وممكن يكون جاله إلتهاب رئوى وده على أساس أن أخوه قال أن فمه وانفه كانوا بيجيبوا دم  فممكن الدم ده من كِبَر حجمه يدخل إلى القصبة الهوائية ويعمل إلتهاب رئوى   pneumonia)ِِِِِِِِِِِAspiration )

ودى كمان تعمل هبوط حاد فى الدورة الدميوة والتنفسية

فالسؤال المهم إذا كانت الوفاة حصلت بسبب هبوط حاد فى الدورة الدموية والتنفسية ؛ أيه اللى عمل الهبوط ده….؟؟؟؟؟؟؟؟؟؟؟؟؟؟؟؟؟؟؟!!!!!!!!!!!!!!

وهخل من الطبيعى أن الحاجة اللى عملت الهبوط فى الدورة الدموية والتنفسية  تحصل لولد عنده 15 سنة..؟؟؟!!!!

والسؤال الاهم ايه سبب العلامات دى على الولد وبعدين فى سؤال مهم كمان هل الولد ده اتكسر له ضلوع ولّا لاءو لو فى ضلوع مكسورة ؛ايه تأثير الكسور دى على الحالة الصحية للولد الصغير ده..؟؟؟!!!!!!!!

طبعاً دى كلها تساؤلات أرجو من الطب الشرعى الشامخ (وكل شى شامخ فى بلدنا)وكلامه على راسنا إحنا من فوق أنه يرد على واحد حمار زىّ مابيفهمش فى حاجة خالصصصصصصصصص

طلبة زمان و طلبة دلوقتى
” و عايرنا نرجع زى زمان … قول للزمان ارجع يا زمان”
الأغنية دي على طول بتيجى في دماغي كل لما أقارن بين طلبة زمان اللي كان الواحد بيشوفهم في الأفلام و طلبة دلوقتى… مثلا تخيل معايا صوره أبيض و اسود لجامعة القاهرة و القبة الشهيرة… و الطلبة لابسين بدل و طرابيش … و مجموعه من الطلبة بيحاولوا يفضوا خناقه بدون شتايم بين طالب و طالب زميله .. و تلاقى مجموعه ماسكه طالب بيحاول يفلفص منهم و يقولهم سيبونى أنا لازم اعرفه مركزه.. و تلاقى التانيين بيحوشوا الطالب التانى اللى مثلا ممكن يكون مشمر قميصه و مش لابس طربوش و لا جاكيت بدله “دليل أنه روش بقى و كده”
و فجأه يفلت الإتنين من اللى بيحجزوا و يجروا ناحية بعض و تلاقيهم وقفوا فجاه قدام بعض و تلاقى أبو طربوش واقف مكشر و بيقول للتانى الروش ” يا أفندى لازم تعرف إنك غلطان ..اللى عملته ده مايصحش إنت إزاى تولع سيجاره جوه المدرج –طبعا مستحيل كانوا يتخيلوا إن ممكن دلوقتى يولعوا سجاير اثناء المحاضره- و إزاى تقعد طول المحاضره تبصبص لزميلتك .. يا افندى الجامعه مكان للتعليم أولا و اى حاجه ثانيا – طبعا ده كان على ايامهم بس..إنما دلوقتى بقت الجامعه مكان للتعارف و الصحوبيه و اى حاجه غير التعليم… بقى للاسف الطلبه بيروحوا الجامعه علشان يصاحبوا و البنات علشان يتصاحبوا و الكل طبعا ينفض للمحاضرات ماهو اصلا المدرج مليان رغم ان معظم الدفعه بيبقى قاعد فى الجناين … التعليم ده أخر حاجه يفكروا فيها.. و هايتعلموا ايه و اصلا الشغل فى مصر مالوش علاقه باللى بيدرسوه و كمان اتحادات الطلبه مافيش وراها غير الرحلات و الحفلات و المسابقات و بس.. طبعا انا مش اعتراضى على الرحلات و الخفلات لكن اعتراضى الاساسى على كلمة و بس
المهم نرجع لأجدادنا بتوع طلبة زمان و نتخيل الصوره تانى … تلاقى الواد الروش الى مش لابس طربوش ولا جاكيت و مشمر القميص و فاتح أول زرارين بيتكلم بثقه و بيقول لزميله ابو طربوش”و ‘إنت مالك إنت .. أنا حر .. إحنا فى بلد ليبرالى ديمقراطي و من حقي اعمل اللى انا عايزه ولا علشان انا يساري يعنى إنت بتضطهدنى إعتبرنى يا اخى من اليسار الليبرالي” .. يقوم يرد عليه الطالب أبو طربوش بهدوء المره دي و يقوله ” يا زميل يا محترم الاتجاهات السياسية مالهاش علاقه بالقيم اللى المفروض كلنا نحافظ عليها.. حريتك تتوقف عند حرية الأخرين.. و إنت بتأذى الاخرين”… يقوم اللى مشمر قميصه يبص فى الأرض و يعتذر لزميله و يروح يسلم عليه.. فجاه يسمع الجميع طالب جاى بيجرى عليهم و بيقول إلحقوا يا شباب.. وزير المعارف قرر يضيف مصاريف إضافية على الطلبه السنة دي و وزير النقل قرر زيادة المواصلات و كل الطلبه رايحين فى مظاهره سلميه لغاية مكتب الوزير و يقدموله عريضة تطالبه بالعدول عن زيادة المصروفات و بعد كده هاينضم الطلبه للإضراب السلمي اللي عاملينه الناس علشان يقاطعوا المواصلات لغاية ما ينخفض سعرها تانى
طبعا الكلام ده كان زمان و بس.. دلوقتى ولا حد عارف يعنى ايه يمين ولا يسار و لا عارف ايه أهمية السياسة و الأحزاب ولا تهمه البلد أساسا
مش مشكله لو الأسعار زادت أصله مش هو اللى بيدفع و مش مشكله لو الدكتور زود سعر الكتاب و أجبر الطلبه أنهم يشتروه
مش مشكله لو الجامعه ما فيهاش معامل أو أجهزة كمبيوتر… حتى مش مشكله لو الحمامات مكسره و محدش بينضفها… حتى لو الدكتور بيدى دروس و بينجح الطلبه اللى تبعه .. هو ماله أهم حاجه يظبط خروجه تمام بعد مواعيد المحاضرات علشان يكلم البنت اللى عايز يصاحبها قبل ما الواد بتاع سنه تانيه يخطفها منه… و ليه بعد المحاضرات .. ماينفضوا للمحاضرة أساسا و أهو خير البر عاجله… والاحسن و الأشد بقى أنهم يروحوا الحفله اللى عاملها الاتحاد للطلبه الجداد .. أهو ممكن يرقص معاها شويه … و يقولها على الرحله اللى عاملها إتحاد الطلبه علشان يعرف يكلمها لوحدها … أكيد دلوقتى فهمتوا ليه إدارة الجامعه بتكون مصره إن اتحاد الطلبه يكون من الطلبه المواليين اللى بيسمعوا الكلام.. علشان محدش يفكر و علشان كله يبقى فى الطراوه
يا ريت طلبة دلوقتى يبقوا زى طلبة زمان.. مش قصدى على البدل و الطرابيش… لكن قصدى على الإيجابيه و الثقافه و حب البلد و تغيير أى وضع سىء .. يبقى الطلبه عارفين بلدهم فيها ايه .. و يختاروا الصح و يقدروا يحاسبوا الدكاتره و يحسنوا التعليم علشان خاطر التعليم هو التقدم… أكيد طلبة دلوقتى ممكن يكونوا أحسن من طلبة زمان لو قرروا يكون مصيرهم بإيديهم

وفقا لبرنامج رئيسنا المحبوب العبقرى و بمناسبة إكتشاف سيادته منذ توليه لشىء لم يكن معروفا فى العالم من قبل يسمى المدن الجديده و الادهى من ذلك و الأمر هو إعتبارها حل جذرى لمشاكل الشباب رغم انها مخصصه للصفوه و رجال الاعمال فقط
يعانى سكان التجمع الثالث و الناس الغلابه بالتجمع الخامس(يعنى اللى ساكنين شقق مش فيلات ) بالقاهره الجديده من عدة مشكلات يستطيع جهاز المدينة حلها بسهوله لو أراد
أول هذه المشكلات هي مشكلة الانقطاع المفاجىء و المتكرر و الغريب لمياه الشرب في هذه الأيام شديدة الحرارة .. حتى بدون أى تنويه اوتحذير قبل قطعها الذى يطول أحيانا لأكثرمن 24 ساعه مع العلم انها لا تنقطع ابدا عن منتجعات الجولف التى تضم الوزراء والسفراء و الحراميه الكبار
ثاني هذه المشكلات هي مشكلة النظافة التي تفاقمت جدا في بعض المناطق (بالتأكيد مناطق المساكن مش الفيلات ) بسبب عدم وجود صناديق القمامة و بالطبع عدم جمعها بواسطة سيارات هيئة تنمية المجتمعات العمرانية …فلجا بعض السكان للإستعانه ببعض العمال لإلقاء القمامة بالصناديق القليله البعيدة جدا أو إلقائها بأنفسهم في صناديق مناطق أخرى أو إلقائها في الشارع و بجوار مداخل العمارات… مع العلم ان سيارات الهيئه تجوب شوارع مناطق الفيلات الفاخره طوال اليوم و يتم كنس الشوارع يوميا فى تلك المناطق
هذا بخلاف سوء حالة التشجير و انعدامه احيانا فى مناطق الشقق و المساكن و اكتست الأشجار و النجيل باللون الأصفر و تحول الكثير منها لبحيرات راكدة و غابات بسبب فتح حنفية المياه بدون وجود مسئول عن الري المنظم
مع العلم بأن اى مشترى للوحدات السكنية يقوم بدفع رسوم اشتراك شهريه للنظافة و المياه و الخدمات بخلاف دفعات الصيانة (3000 جنيه ) التي لم نرى لها اى جدوى في ظل سوء حالات العمارات من الداخل
ومع العلم بأن جهاز المدينه اصبح يبيع تلك الشقق بالمزايدات و بأسعار عاليه الان بعد اشتهار تلك المناطق
إن الكثير من السكان يخافون إن تتحول تلك المساكن الجميلة التي هربوا إليها من فوضى العشوائيات و الزحام إلى عشوائيا أخرى لكن ببعض الشياكه .. خصوصا مع أزمة المواصلات التي طرأت حديثا بعض منع سائقي الميكروباصات من العمل داخل المدينة و استبدالهم بشركات النقل الجماعي الفاشلة المستغلة التي تؤخرالسكان المضطرون الذين لا يملكون سيارات عن الذهاب لأعمالهم صباحا و تستغل عدم وجود بديل غيرهم سواء حكومي أو خاص بجانب سوء الخدمة و تكدس الركاب بسبب قلة سيارات تلك الشركات على هذا الخط الذي يزداد عدد مستخدميه يوميا
بالرغم من ان سكان مساكن الشباب أو الإسكان الاستثماري بالتجمع الثالث و الخامس في ازدياد مستمر و لا تزال الخدمات و المواصلات و المرافق كما هي ..
فهل هذا من ضمن البرنامج العبقرى للرئيس مبارك ام ان القاهره الجديده ستضاف للمناطق العطشى التى كثرت فى عهده بصوره لا مثيل لها فى التاريخ ..حتى فى احلك ايام الجفاف

عنوان كئيب لشخص كئيب و مكتئب
من فتره كبيره كنت بفكر اعمل مدونه .. و كان فيه اكتر من اسم فى دماغى
لكن المشكله انى كانت بتجيلى كل شويه موجات متتابعه من الإحباط رغم انى من الناس اللى تحس انهم مكبرين دماغهم و مش فى دماغهم اى حاجه
لكن بجد زهقت
زهقت من النظام ده و الشعب ده و المعارضه دى
نظام غبى قذر عمره ما هايسمح بأى تغيير أو إصلاح حتى لو امريكا ضغطت عليه او مثلت انها بتضغط عليه
و شعب جبان سلبى جاهل عمره ما هيساعد فى أى تغيير ولا هايقبله و لا عمره اساسا ممكن يتخيله … دا حتى شعب بيترعب لو اتخيل ان مبارك ممكن يموت
و معارضه ارجوزات … شوية مثقفين على شوية افاقين على شوية مرتزقه .. كل اللى فالحين فيه التنظير على بعض و الرغى و الكلام الفارغ و المعارك الوهميه و خصوصا مع بعضهم … ده غير طبعا الظهور فى الفضائيات و حب الزعامه الوهميه .. لا حاسين بشعب و لا الشعب ناوى يحس بيهم
ولا عمرهم ما هيتحدوا ولا عمرهم ما هايغيروا بنفس افكار السبعينات
دا حتى شباب المعارضه اللى كان كلهم حماس .. اتوسخوا من الكبار و بقى كل نشاطهم هو القعاد على القهاوى و الكلام عن مين صاحب مبن و مين نام مع مين … او ازاى نسيطر و نمنع التيار الفلانى و نحرج التيار العلانى
طب هاتسألنى و تقول ايه اللى طققها فى دماغك كده و خلاك تعمل مدون … هى ناقصه مدوننين ؟؟ .. مانت عارف ان كل المناضلين بتوع زمان بقوا مناضلين على النت … و كاه بيكتب بلازمه او من غير لازمه
هاقولك هى جت عليا
اعتبره اى كلام من الكلام اللى بنسمعه و بنقراه
يمكن تلاقى فيه حاجه مختلفه
و يمكن احباطى يقل شويه
و يمكن يزيد
ghosty
ماهرى حتى النخاع

Welcome to WordPress.com. This is your first post. Edit or delete it and start blogging!