فلتسقط الحكومه الالكترونيه

أكتوبر 16, 2007 at 12:02 م (تدوينات)

الزملاء الاعزاء

اعترف لكم فى تلك اللحظه بسذاجتى المفرطه

فقد صدقت الحزب الوطنى فى اكاذيبه

فقد اعلن وزير اتصالات الحزب الوطنى عشرات المرات ان تركيب تليفون ارضى اصبح اسهل من التنفس الطبيعى… طبعا طبقا لتوجيهات السيد الرئيس و برنامجه الانتخابى

و انه يكفى ان اذهب للسنترال حتى يتم تركيب تليفون ارضى بعد 48 ساعه على الاكثر

للاسف صدقت و كذبت عقلى اللى قاللى ان ديل الحزب الوطنى عمره ما هايتعدل

و روحت سنترال القطاميه الالكترونى الجديد .. وقدمت طلب

ايوه قدمت طلب زى باقى الناس

و فرحت لإن السنترال كان فاضى .. و حمدت ربنا انى ساكن فى التجمع الخامس مش فى فيصل … اخيرا شوفت سنترال فاضى

و قاتلولى تعالى بعد اسبوع … قلت ماشى

قالولى لاول مره فى مصر ممكن ترفض تركيب عدة الحكومه اللى تمنها 275 جنيه رغم انها عده معفنه … قلت قشطه

و تعاقدت على خط .. ايوه تعاقدت على خط

صحيح هما قعدوا مذنبينى فى طابور انا اول واحد فيه لمدة ساعه .. لكن برضه عذرتهم .. برضه لازم ياخدوا وقتهم علشان يتخلصوا من تاخيرهم و تعذيبهم للناس

و كمان قالولى التركيب بعد يومين

والله ماصدقت نفسى

و اخدت يوم تركيب الخط اجازه من الشغل

و محدش جه

قولت اكيد ليهم عذرهم

احنا فى رمضان و انا ساكن فى مدينه جديده و المشى فى الصحرا صعب فى الصيام “نسيت اقول ان الكلام ده كان فى بداية رمضان” و يمكن فنى التركيب تاه فى الصحرا

اتصلت بيهم .. قالولى معلش… استنى بعد بكره

و اخذت اجازه تانى .. و برضه محدش جه

و اتصلت و قالولى بعد بكره

و برضه محدش جه

اتكرر الموضوع ده اربع مرات

لغاية ما اخدت اجازه و روحتلهم السنترال

لقيت الموظفين مأنتخين و شبه نايمين .. و معظمهم مزوغ و فنى التركيب عمال يهرب منى و يقول مش فاضى …اصلهم صايمين

عملت مشكله. و هددت بإنى هاخرج من السنترال و هاعمل مظاهره لوحدى قدام وزارة الاتصالات

قام المدير بعت معايا الفنى

ووصل السلك

اخيرا

و للاسف كانت المفاجأه اللى كان لازم اتوقعها فى ظل الحكومه الالكترونيه …الحراره ماجتش رغم مرور حوالى شهر على التعاقد.. اصل فيه عطل فى خطوط السنترال الالكترونى الجديد الغير مسبوق فى تاريخ مصر

اتصل بينا بكره

و اتصلت

مره و اتنين و عشره.. من سذاجتى

و فى الاخر قالوا بعد العيد بقى و كل سنه و انت طيب

والله اعلم

العيب مش على الحزب الوطنى … العيب على اللى يصدقه

الزملاء الأعزاء

بعد اكتشافى كم كنت ساذجا و ان الحل الاصلاحى صعب مع هذه الحكومه

اعلن لكم و لهم انى سأعطيهم فرصه اخيره لمدة ثلاثة ايام من بعد العيد و بعدها…..

سأتوجه وحدى لوزارة الاتصالات …. و هناك هايشوفوا اللى عمرهم ما شافوه

ملحوظه

تم إلغاء التهديد الأخير مع إنى فعلا كنت ناوى اعمله… لكن حظهم حلو.. الحراره جت

ghosty

ماهرى حتى النخاع

تعليق واحد

م.محمد جعفر قال,

أكتوبر 20, 2007 في 3:18 م

السلام عليكم

ده انت طيب خالص يا راجل يا طيب

فكرتني بأيامي الأخيرة في الكلية وكان حصل موقف طاريء فقدت فيه كل أوراقي من أول البطاقة إنتهاء بجواز السفر مرورا بشهادة الميلاد و رخصة القيادة ، ATM كل الأوراق اللي تحمل إسمي.

المهم حصلت مشكلة بعد تخرجي إني محتاج أطلع كارنيه النقابة فالنقابة عاوزة بطاقتي الشخصية وفي نفس الوقت السجل المدني مش عاوز يعملي بطاقة جديدة بدون وجود جهة تختملي على بياناتي.

يعني السجل المدني عاوز النقابة تختم على الورق والنقابة عاوزة البطاقة علشان تختم على الورق!

والبيضة قبل الفرخة ولا الفرخة قبل البيضة؟

وزاد الموضوع نيلة أني لازم أقدم ورقي للجيش وانا ممعيش أي ورقة تثبت أنا مين ، في الآخر لقيت على موقع الحكومة الإلكترونية خدمة إصدار بدل فاقد للرقم القومي قدمت فيها ودفعت الرسوم من على النت وادولي رقم استلم بيه البطاقة الجديدة وصدقت!

بكل سذاجة صدقت

رحت في الميعاد ووقفت في الطابور لحد الشباك وخد يا استاذ الرقم ده وهات بطاقتي

طبعا الراجل بصلي على اساس اني مجنون ، وقالي

فين يا أستاذ الوصل اللي معاك؟

حكيتله القصة

قالي انا ما اعرفش لا نت ولا كمبيوتر ، انا ليا وصل مختوم يا استمارة عليها ختم النسر تجيبهولي على الاستمارة تجيبهولي على ايدك مالييش دعوة ، انما انا ما اعرفش لا نت ولا كمبيوتر

طب الفلوس اللي انا دفعتها على النت؟

طبعا بصلي كأني مصر على إدعاء الجنون.

وفي الآخر طبعا ما خدتش أي حاجة.

جربت مرة تانية عند دفع غرامات المرور عن السيارة وتفتح الف لينك والف صفحة وتقعد تسجل بيانات العربية مليون مرة ورقم الموتور والشاسيه واكتب رقم فيزا وحناخد رسوم زيادة و و و و و و و.

وبعد كل ده يقولك عفوا

هذه الخدمة مغلقة!

حكومة إلكترونية مين ياعم

ده انا بقالي 6 سنين الكهرباء بتقطع من عندي يوميا او الأصح بتجيلي كام ساعة في اليوم و بعد كل ده بتجيلي فاتورة كهرباء فلكية مع العلم أني شبه مش مشغل حاجة غير كمبيوتر وتلاجة!

م.محمد جعفر